އޮސްޓްރޭލިޔާގެ ރަގްބީ ކުޅުންތެރިޔާ ކޮރީ ޕެޓަރސަން އިސްލާމްވެއްޖެ

މީގެ ކުޑަ ދުވަސްކޮޅެއް ކުރިން އިސްލާމްވެފައިވާ އޮސްޓްރޭލިޔާގެ ނޭޝަނަލް ރަގްބީ ލީގްގެ ކުޅުންތެރިޔާ ކޮރީ ޕެޓަރސަން އިސްލާމްވީކަން އޭނާ ޔަޤީންކޮށްދީފިއެވެ. އިސްލާމްވީކަމަށް އަޑުފެތުރިފައިވާތާ ދުވަސްކޮޅެއް ވެފައިވަނިކޮށް ކޮރީ އިސްލާމްވިކަން ޢާއްމުންނަށް ޔަޤީންވެފައިމިވަނީ މިދިޔަ އާދީއްތަ ދުވަހު އޭނާގެ ޓުވިޓަރ ޕޭޖްގައި ރޯދައަށް ތައްޔާރުވުމާ ބެހޭގޮތުން ޓުވީޓެއްކޮށްފައިވީމައެވެ.

ކޮރީގެ ޢުމުރުގައިވެސް ފުރަތަމަ ފަހަރަށް ރަމަޟާން މަހާ ކުރިމަތިލާތީ އޭނާ ކުޅެމުން އަންނަ ޓީމް ނޯރތް ކްއީންސްލޭންޑް ކައޮބޯއީސްގެ އޮފިޝަލުން ދަނީ އެކަމާ ބެހޭގޮތުން އޭނާއާ މަޝްވަރާކުރަމުންނެވެ. ރަމަޟާން މަހުގެ ފަހު ކޮޅު ދުވާލުގެ ވަޤުތުތަކުގައިވެސް ކުޅެން ޖެހޭ ކޮރީގެ ކުޅުމަށް އަސަރުކޮށްފާނެތީ އެ އޮފިޝަލުން ތިބީ ކަންބޮޑުވެފައެވެ. ނަމަވެސް މިމަހު ކޮރީ ކުޅެން ޖެހޭ ގިނަ މެޗްތައް ޝެޑިއުލް ވެފައިވަނީ ރޭގަނޑަށެވެ.

އޮސްޓްރޭލިޔާގެ ހެރާލްޑް ސަން ނޫހުން އިއްޔެ ކޮރީއާ ގުޅުމުން އޭނާ އިސްލާމްވެފައިވާކަން ޔަޤީންކޮށްދީފައިވެއެވެ. އަދި މިހާރު ރަމަޟާން މަހުގެ ރޯދަވެސް ހިފަންފައިފާ ވާކަމަށް އޭނާ ބުނެފައިވެއެވެ. ނަމަވެސް އިތުރު ތަފްސީލެއް ދެވޭނީ އެޓީމުގެ އާ ކޯޗު ހާޟަރް ނާޞިރުއާ ވާހަކަދެއްކުމަށް ފަހުގައިކަމަށް އޭނާ ބުނެފައިވެއެވެ. ނާޞިރުއަކީ 1999 ވަނަ އަހަރު އިސްލާމްވި އެހެންކުޅުންތެރިއެއް ކަމަށް ވާ އެންތޮނީ މަންޑައިން އިސްލާމްވުމުގައި ބޮޑު ރޯލެއް އަދާކޮށްފައިވާ މީހެކެވެ. ކޮރީ އިސްލާމްވެފައިމިވަނީ ޙާޟަރު ނާޞިރުއާއި އެންތޮނީ މަންޑައިން އަދި 2008 ވަނަ އަހަރު އިސްލާމްވެފައިވާ އެހެން ރަގްބީ ކުޅުންތެރިއެއްކަމަށްވާ ސޮނީ ބިލް ވިލިއަމްސްއާ އެކު ގާތް ގުޅުންތަކެއް ބޭއްވުމަށްފަހުގައިކަމަށް ނޫސްތަކުން ބުނެއެވެ.

އިއްޔެ ނޯރތް ކްއީންސްލޭންޑްގެ ކޯޗް ނީލް ހެންރީ އަދި އެޓީމްގެ ފުޓްބޯލް މެނޭޖަރ ޕީރޓަރއާ އެކު ކޮރީ ދެއްކި ވާހަކަތަކުގައި އޭނާގެ ކުޅުމަށް ބަދަލު ނާންނާނެކަމަށް ބުނެފައިވެއެވެ. ބައެއް ނޫސްތަކުން ހާމަކުރާ ގޮތުގައި ކޮރީ ފަދަ އަލަށް އިސްލާމްވާ މީހުން ރޯދައަށް ހުރުމުގައި ލުއިތަކެއް އިސްލާމްދީން ލިބިދެއެވެ. ޕީރޓަރ، ދަ ޑެއިލީ ޓެލެގްރާފަށް ދިން އިންޓަރވިއުގައިވެސް މިފަދަކަމަކަށް ޢިޝާރާތްކޮށްފައިވެއެވެ.

ރަމަޟާން މަސް ފެށެނިކޮށް ކޮރީ ޕެޓަރސަން ކޮށްފައިވާ ޓްވީޓްގައި ވަނީ:

” Big challenge for me starting tomoro. Looking forward to it and the satisfaction and discipline it will bring Big challenge for me starting tomoro ”

އެއަށްފަހު އޭނާ ކޮށްފައިވާ ޓްވީޓްގައި ވަނީ

” Day 1 and feeling good. Looking forward to the nxt 30 days. Hope everyone is safe and well. Salaams?’ މިފަދއިންނެވެ.