ސްކޮޓްލޭންޑްގެ ތަޢުލީމީ މަންހަޖުގައި އިސްލާމްދީނަށް ދެވޭ އަޙައްމިއްޔަތު ކުޑަކަމުން، އެޤައުމުގެ މުސްލިމުން އަމިއްލަ މިނިވަން އިސްލާމީ ތަޢުލީމީ މަރުކަޒުތަކެއް އުފެއްދުމުގެ ވިސްނުން ގެންގުޅެމުން އެބަދެއެވެ.
ސަންޑޭ އެކްސްޕްރެސް ފަދަ ބައެއް ނޫސްއިދާރާތަކުން މަޢުލޫމާތު ދޭ ގޮތުގައި، ސްކޫލުތަކުގައި އިސްލާމްދީން ޕްރޮމޯޓްކުރުމަށް މަސައްކަތް ނުކުރެވޭތާ، ބައެއް ޓީޗަރުންގެ ފަރާތުން ފެންނަ ލާދީނީ ޢަމަލުތަކުގެ ސަބަބުން ބެލެނިވެރިންވަނީ ކަންބޮޑުވުން ފާޅުކޮށްފައެވެ.
އަމިއްލަ މިނިވަން ސްކޫލްތަކެއް ހުޅުވުމުގެ ވިސްނުން އެއްބަޔަކު ގެންގުޅެމުން ދާއިރު، ސަރުކާރުގެ ޚަރަދުގައި ހިންގޭ އިސްލާމީ ސްކޫލްތަކެއް ހުޅުވުމަށް ޤާނޫނީ ބާރު ބޭނުންކުރުމަށް އެއްބަޔަކު ގޮވާލަމުން ދެއެވެ. މިފަދަ ގިނަ ޚިޔާލުތަކެއް ކުރެވެމުން ދަނީ ސްކޮޓްލޭންޑްގެ މުސްލިމުން ހިންގަމުންދާ ވެބްސައިޓެއްކަމުގައިވާ ގްލަސްގޮވްމުސްލިމްސް.ކޮމް ގައެވެ.
ސްކޮޓްލޭންޑް ގައި މިހާރު ހުރީ އިސްލާމީ ތައުލީމުދޭ އެންމެ ޕްރައިމަރީ ސްކޫލެކެވެ. އެއީ، ސްކޮޓްލޭންޑްގެ އެންމެ ބޮޑު ސިޓީކަމަށްވާ ގްލަސްގޮވްގައި 2010 ވަނަ އަހަރު ހުޅުވުނު ޤަލަމް އެކަޑެމީ އެވެ.
ނަމަވެސް، ޔަހޫދީ އަދި ނަޞްރާނީ ދީންތަކުގެ ސްކޫލްތައް ސްކޮޓްލެންޑްގެ ސަރުކާރުގެ ޚަރަދުގައި ބަލަހައްޓަމުންދާތީ، ސްކޮޓްލޭންޑްގެ ސަރުކާރުގެ ވެރިޔާ ފަސްޓް މިނިސްޓަރ އެލެގްޒެންޑަރ ސޭމަންޑް ވިދާޅުވެފައިވަނީ، އިސްލާމީ ސްކޫލްތަކެއް ހެދުމުގެ ޕްލޭންތަކަށް އޭނާ ތާއީދުކުރާކަމަށެވެ.
2001 ވަނަ އަހަރުގެ ރަސްމީ ހިސާބުތައް ދައްކާގޮތުން ސްކޮޓްލޭންޑްގައި ދިރިއުޅޭ މުސްލިމުންގެ ނިސްބަތަކީ މުޅި އާބާދީގެ އެންމެ 0.9% އެވެ.
ސްކޮޓްލޭންޑާއި އިނގިރޭސި ވިލާތާއި ވޭލްސް އަދި ނޮަދަރން އަޔަރލެންޑް ގުޅިގެން ގްރޭޓް ބްރިޓެއިން ނުވަތަ ޔުނައިޓެޑް ކިންގަޑަމް (ޔޫ.ކޭ) އުފެދިފައިވެއެވެ. އެހެންކަމުން ސްކޮޓްލެންޑަކީ ޔޫ.ކޭ ގެ ބައެކެވެ. ނަމަވެސް އިނގިރޭސިވިލާތުގެ ބައެއް ނޫނެވެ.
No comments:
Post a Comment